Mércores 28 de outubro de 2026
Casa da Cultura Poeta Lois Pereiro.
CASPERVEK
Comezos
Caspervek Trío fundouse en 2013 polo pianista Brais González e o percusionista Blas Castañer. A súa primeira actuación foi en xaneiro de 2014, interpretando unha partitura orixinal e improvisada para o Nosferatu de F. W. Murnau. Un mes máis tarde, o violinista Eduards Vecbastiks uniuse ao dúo e comezaron a escribir novas bandas sonoras para as obras mestras do expresionismo alemán. Nos seus primeiros catro meses de actividade, a banda estreou catro bandas sonoras. A prensa local especializada definiu este debut como "a gran sorpresa de 2014".
Primeiros anos
O trío alcanzou rapidamente certo recoñecemento local, tocando nalgúns dos principais festivais da rexión como o Via Stellae ou o Festival Sinsal. Un ano máis tarde, Caspervek faría a súa primeira xira europea. Unha viaxe que lles levou a actuar nunha ducia de países do continente, estreando cinco novas bandas sonoras e actuando en importantes escenarios como o Museo Nacional de Estonia, o Auditorio Baltais Fligelis de Letonia ou a Galería FLUX de Budapest. Nos anos seguintes, Caspervek seguiría actuando noutros importantes escenarios europeos como a Lytgen Station de Copenhague, o GORS de Rezekne ou o Kalnciema Kvartals de Riga. En 2015 e 2016, Caspervek formou parte da programación de The Urban Beach Cinema, un dos maiores cinemas ao aire libre de España, onde ofreceu máis de dez películas mudas ante miles de persoas. O 26 de outubro de 2016 fixo o seu primeiro cine-concerto para a Sociedad Filarmónica de Monforte de Lemos.
Anos intermedios
En 2016, unha nova violinista, Raquel Fernández, uniuse á formación, mentres que Eduards trasladouse a Alemaña. Durante estes anos, o grupo acentuou o seu interese nos concertos didácticos, traballando estreitamente con festivais de cinema e institucións académicas para desenvolver programas específicos que achegasen o cinema mudo e o patrimonio cinematográfico aos nenos. Como resultado deste traballo, o grupo ofreceu concertos educativos no Auditorio de Galicia (Santiago de Compostela), o Teatro Afundación (Vigo), ou o Centro Cultural Záhrada en Banska-Bystrica (Eslovaquia), así como en ducias de escolas e colexios de toda España.
Novos camiños
En 2019 o grupo decide afastarse da súa formación como trío para evolucionar cara a un ensamble modular segundo as necesidades de cada película. Esta nova etapa comeza coa estrea do proxecto máis ambicioso da historia de Caspervek: unha épica representación da paixón de Juana de Arco de C. T. Dreyer cun coro de 24 cantantes e un conxunto de 12 músicos que se estrea en maio de 2019 ante un cheo total en Vigo, en Monforte representouse o 18 de novembro de 2022. Desde entón, a filosofía de Caspervek e facilitar a incorporación de novos músicos á banda. Así mesmo desde 2019, Caspervek acorda con Tolemias, pioneira na distribución de concertos en streaming, sendo este o primeiro proxecto que integra o cinema mudo coas novas tecnoloxías multiángulo.
GO WEST
O filme
Despois de fracasar en todos os seus intentos de atopar traballo na cidade, un mozo solitario —interpretado por Buster Keaton— decide probar sorte noutro lugar e sóbese clandestinamente a un tren crendo que vai a Nova York. Pero o tren diríxese en dirección contraria: ao afastado Oeste. Tras unha serie de peripecias, Buster acaba nun rancho de gando onde, sen experiencia algunha, consegue traballo como vaqueiro. Alí establece unha entrañable amizade cunha vaca marxinada, Brown Eyes, que cambiará o seu destino e revelará un lado insólitamente tenro do cine de Keaton.
Go West estreada en 1925, supuxo un afastamento dos escenarios urbanos e industriais tan habituais nas súas comedias para explorar o mito do Oeste americano desde unha perspectiva cómica e melancólica. Ao remate a estampida de vacas convértese nunha escena surealista e memorable
O personaxe de Keaton, chamado simplemente "Friendless" (sen amigos), representa como nunca a figura do outsider total, alguén sen habilidades útiles, sen raíces e sen voz. Pero a súa forma de relacionarse co mundo —e cos animais— revela unha humanidade desarmante. A relación coa vaca Brown Eyes é o corazón emocional da película, e aínda que poida parecer ridículo, Keaton consegue transmitir tenrura e compaixón cunha sinceridade inesperada.
Aínda que Go West non foi tan celebrada como outras obras de Keaton na súa estrea, gañou aprecio co tempo, especialmente polo seu ton atípico, a súa sensibilidade e a súa sutil crítica ao mundo moderno.
A banda sonora
A Banda Sonora de Caspervek para "Go West" trata de evocar as músicas do afastado Oeste e dos rodeos americanos á vez que as mestura coas sonoridades típicas do swing e o jazz clásico. A música foi estreada por Laura Lorenzo, Brais González e Blas Castañer en novembro de 2021.
Notas
A vaca Brown Eyes foi adestrada persoalmente por Keaton recibindo un salario semanal de 13 dólares e figurando oficialmente nos créditos.
Buster Keaton leva durante toda a película o mesmo traxe negro que usaba na cidade, unha sátira visual continua do forasteiro fóra de lugar.
A escena final da estampida foi filmada realmente no centro de Los Ángeles, e con gando auténtico o que causou tales interrupcións que a produción tivo que negociar coas autoridades locais durante semanas.
Texto CASPERVEK
